Añanan pasá, un di nos revistanan atventista a publiká un parabel tokante un muras teribel. Segun ku hende tabata pasa banda di e kaminda a lo largu di dje, hopi biaha a ataká nan i nan tabata kai aden. Por a tende nan gritunan moribundo a traves di henter e pueblo. Tabata teribel.
E hendenan a tene un konsilio di pueblo. De echo, nan a tene hopi konsilio di pueblo. A presentá vários teoria i artíkulo analisando e kousa i tin biaha asta analisando solushonnan. Pero no a hasi nada hamas eksepto sigui reuní i papia. A traves di añanan, e diskushonnan a sigui. Hendenan tabata skibi disertashonnan riba e tópiko. Tabata trese oradornan invitá. Tabata tene marshenan di pruga pa rekoudá sèn pa asina por a proveé kuminda pa esnan ku tabata sakrifiká asina tantu ora sintando den e reunionnan akí. Finalmente, a rekoudá sèn pa konstruí un sala di reunion kaminda zonido no ta drenta pa asina e gritunan di esnan pèrdí i muriendo lo no stroba e diskushonnan kontinuo. Pero niun hende a hasi algu pa yuda esnan ku tabata den problema. I niun hende a hasi algu pa stòp as hende di bai pèrdí den e muras. Nan tabata solamente papia.
E iglesia komo un totalidat i bo klas di Sabat Skol en partikular no ke ta meskos ku e hendenan den e pueblo ei. Nos stima nos tempu huntu pa hasi orashon, pensa, kompartí, i diskutí. Pero nos ta anhelá pa bai mas ayá di esaki i realmente hasi algu pa i huntu ku esnan rònt di nos. Nos ke hasi un diferensia den nos komunidatnan i rònt mundu. Nos ke pa e trabou kaba, i nos ke pa Hesus regresá.
E Guia di Estudio di Beibel pa Sabat Skol di Adulto di e kuartal akí ta diseñá pa enfoká atenshon riba sali eifó i hasi algu. Nos lo saminá hopi storianan maravioso di Beibel. Nos lo lesa tokante eksperensianan i ilustrashonnan eksitante. Nos lo siña tokante rekursonan disponibel pa asistí nos den yega serka nos bisiñanan (spesialmente serka esnan ku no tin un trasfondo kristian). Pero eseinan lo ta solamente formanan di ilustrá i motivá nos. E enfoke real, e kurason real, di kada lès ta loke lo kompartí riba djaweps kada siman, un desafio pa sali bai i realmente hasi algu.
Nos lo kompartí persepshonnan teológiko i proveé hèrmèntnan i ideanan pa bo traha kuné. I kada porshon di e lès di djaweps lo emití un progreso kuidadoso di desafionan. E lo kuminsá ku loke ta fásil. I segun ku e kuartal ta avansá, lo tin oumentonan sutil (i no asina sutil) den e desafio. E meta ta pa kada un di nos tuma e desafio, resa pa Spiritu Santu guia nos, apliká loke nos a siña, i despues pasa un par di minüt den e siguiente siman diskutiendo kon el a bai. Esaki no mester ta un momento di broma, sino un momento di kompartí, tantu tokante loke a bai bon komo loke no a bai bon. Segun ku nos ta kompartí, e grupo lo generá ideanan. Listanan di orashon lo krese (personal i kolektivo).
Al final, ta nos deseo ku lo rekordá e kuartal akí, pero no pa pensamentunan memorabel, storianan interesante, òf konseptonan teológiko profundo. Esakinan lo tei, hopi di nan. Pero ta nos deseo ku nos tur lo wak bèk riba e kuartal akí komo e momento ora Spiritu Santu a tuma nos esfuersonan humilde i a obra milagernan mishonero pa honor i gloria di Su nòmber.
A establesé e Sentronan di Mishon Global pa promé biaha pa Asosiashon General na 1980. Nan ta operá bou di direkshon di e Ofisina di Asosiashon General di Mishon Atventista. Tin aktualmente seis sentro. Nan propósito ta pa yuda e iglesia kuminsá, mas efektivamente, gruponan nobo di kreyentenan entre e gruponan prinsipal di personanan no kristian di mundu.
Na momento di e eskrito akí, e direktornan di e sentronan akí (Petras Bahadur, Richard Elofer, Kleber Gonçalves, Clifmond Shameerudeen, Doug Venn, Greg Whitsett), asistí pa Gary Krause (direktor, Mishon Atventista), Homer Trecartin (direktor hubilá, Sentronan di Mishon Global) i Jeff Scoggins (direktor di planifikashon di Mishon Global), kolektivamente a skibi e Guia di Estudio di Beibel pa Adulto akí. Pa mas informashon, por fabor bai na Global Mission Centers